UPS-ის შერჩევისას ყველაზე მნიშვნელოვანი გადაწყვეტილება მისი ტიპია. ბაზარზე ძირითადად ორი ტიპია: Line-interactive და Online. ორივე იცავს დენის გათიშვისგან, მაგრამ განსხვავებულად მუშაობს.

როგორ მუშაობს Line-interactive UPS

ჩვეულებრივ რეჟიმში მოწყობილობა ელექტროქსელიდან იკვებება, UPS კი ძაბვას აკონტროლებს და ავტომატური რეგულატორით (AVR) ასწორებს მცირე ვარდნებს და მატებებს აკუმულატორზე გადასვლის გარეშე. გათიშვისას UPS აკუმულატორზე გადადის – ამას რამდენიმე მილიწამი სჭირდება (ჩვეულებრივ 2–10 ms), რაც კომპიუტერების და ქსელური მოწყობილობების უმეტესობისთვის შეუმჩნეველია.

  • + ხელმისაწვდომი ფასი
  • + მაღალი ეფექტურობა, ნაკლები სითბო და ხმაური
  • − გადართვის მცირე დრო
  • − აკუმულატორზე ზოგ მოდელს მიახლოებითი სინუსოიდა აქვს
  • − ვერ ასწორებს სიხშირეს და ძლიერ ხმაურს ქსელში

როგორ მუშაობს Online (ორმაგი გარდაქმნის) UPS

Online UPS ქსელის ცვლად ძაბვას ჯერ მუდმივად გარდაქმნის, შემდეგ კი ინვერტორით ქმნის ახალ, იდეალურ სინუსოიდას. მოწყობილობა ყოველთვის ინვერტორიდან იკვებება, ამიტომ გათიშვისას გადართვა საერთოდ არ ხდება (0 ms), ხოლო ძაბვა და სიხშირე ყოველთვის სტაბილურია – ქსელის მდგომარეობის მიუხედავად.

  • + სუფთა სინუსოიდა და სტაბილური ძაბვა/სიხშირე
  • + გადართვის დრო ნულია
  • + მუშაობს ძალიან არასტაბილურ ქსელში და გენერატორთან
  • + მოდელების უმეტესობას აქვს გარე აკუმულატორების მიერთების შესაძლებლობა
  • − უფრო ძვირია
  • − ნაკლები ეფექტურობა (≈90–95%, ECO რეჟიმში მეტი), მეტი სითბო და ვენტილატორის ხმა

შედარების ცხრილი

Line-interactiveOnline
გადართვის დრო2–10 ms0 ms
ძაბვის ფორმა აკუმულატორზემოდელზეა დამოკიდებულისუფთა სინუსოიდა
ძაბვის სტაბილიზაციასაფეხურებრივი (AVR)სრული
სიხშირის სტაბილიზაციაარაკი
გენერატორთან მუშაობაშეზღუდულიკარგი
ეფექტურობამაღალისაშუალო (ECO რეჟიმში მაღალი)
ფასიდაბალიმაღალი

რომელი ავირჩიოთ

Line-interactive საკმარისია, თუ იცავთ საოფისე და სახლის კომპიუტერებს, როუტერებს, ვიდეოჩამწერებს, სალაროებს, და ქსელში ძაბვა შედარებით სტაბილურია.

Online აირჩიეთ, თუ გაქვთ სერვერები და ქსელური კარადა, სამედიცინო ან ლაბორატორიული აღჭურვილობა, გათბობის ქვაბი ან ტუმბოები, თუ ძაბვა ხშირად ვარდება ან ხტება (რაც რეგიონებში ხშირია), თუ UPS გენერატორთან ერთად იმუშავებს, ან თუ საათობრივი მუშაობა გჭირდებათ გარე აკუმულატორებით.

დიდი ობიექტებისთვის იხილეთ მაღალი სიმძლავრის და მოდულარული UPS-ები. სიმძლავრის შესარჩევად წაიკითხეთ როგორ შევარჩიოთ UPS, ხოლო მუშაობის დრო გამოთვალეთ კალკულატორით.